【小兒科行山入門2】灣仔峽~警隊博物館~香港仔水塘

【小兒科行山入門2】灣仔峽~警隊博物館~香港仔水塘
16 December, 2017 梨子林
In Articles, Blog, 梨子林

香港仔水塘公園行山徑
網站(交通及簡介):

http://www.hike.hk/load.jsp?route=wcgap

http://www.getreadyhk.com/leisure-and-fun/hong-kong-outdoor-activity/outing-spot/item/844-wanchai-aberdeen-hiking
難度: (1.5星) 警隊博物館入口處有長樓梯,向水塘方向沿途有少量斜路
時間: 約1~1.5小時
長度: 約3公里

(2016.10) 又嚟試吓BB班行山,今次同埋婆婆、舅父一家人出門,又老又嫩,當然係要揾幾好行又唔會太長嘅山徑。最後我哋決定由灣仔峽出發,先到警隊博物館睇吓,再去香港仔水塘。

到達山頂甘道的警隊博物館,嘩!婆婆先行嚇一跳,原來有一條長樓梯。

小朋友,就梗係唔知咩叫「警崗」啦,於是又介紹一下先繼續上去……


再轉個彎,就到博物館啦,門口有座砲台都幾型㗎!


警隊博物館內係唔影得相嘅,令我雙手即時得閒咗,可以細心參觀。入面除咗有歷代警隊嘅制服、裝備、槍械同用具之外,仲有過往年代嘅生活用品,好似我哋細路哥時代嘅撥輪電話,對依代小朋友真係幾陌生。另外,令我印象幾深嘅係黑社會/三合會同毒品嘅介紹,好似忽然將人帶到社會嘅一個陰暗面一樣。警隊博物館,如果細心睇都可以花30分鐘以上,但我哋啲帶住小朋友都可算係走馬看花,睇咗一陣就正式上路了!

出咗停車場,沿住甘道向左走到分叉路口,要揀「香港仔水塘道」。

見到「香港仔郊野公園」就啱喇。


一入行山徑,就有好多得意嘅植物吸引眼球!

      
秋高氣爽,行山真係幾舒服㗎!


約十五分鐘後,開始有斜路,而且係向下斜嘅,婆婆居然一馬當先行得好快,佢話條路迫住佢行得快喎!😂

沿途繼續有有趣植物,風景都幾靚。不過動物昆蟲就少啲,滿足唔到我家嗰兩個小昆蟲專家。

行咗大半個鐘,終於有個休息站,好多人坐吓休息吓。


而且比佢哋見到螞蟻搬蟲蟲,總算有交代。

繼續上路,依度有燒烤場,而且開始接近水塘啦!

腳底按摩區…… 痛到飛起!

到咗第一個大霸,係「香港仔上水塘」。

有山有水、就梗係一個字:「靚」啦!

向下望嘅小橋,好多人由下而上取景。

通常人走過水霸都可能會直接行到盡頭繼續去,依個時候好彩有舅父,唔知點解佢由細到大永遠識路。原來要去下水塘,要返水霸一開始有個位,有條小路落去。行返轉頭依度落,唔好miss咗呀!

轉咗落小路後,好快就會可以由下向上見到壯觀嘅水霸景。

再向前行,一路都係窄窄嘅小路。右邊忽然出現一小塊休息區,左邊就有美麗嘅水塘景。

行吓行吓,原來好快就到下水塘。

有山有水,就是美景!

水塘內有龜仔游水、有隻好靚嘅白鷺、仲有……船頭尺?

湖水好似鏡面一樣。

再往前行,有翠綠嘅細葉松…… 原來,離開下水塘再行一陣就係尾聲啦!

對我嚟講唔夠長,但原來行個半鐘暫時已經係婆婆同佬佬嘅極限啦,佬佬仲未去到下水塘已經有少少扭計。其實依度交通好方便,如果仲有腳骨力,再行十分鐘就可以去到香港仔市區食個tea。今日嘅行程好容易行,而且有水塘景,但對我家嘅小昆蟲專家嚟講略嫌唔夠小動物睇,下次再發掘吓其他BB班路線啦!

後記:幾個月後冬天時同朋友行同一條路,發現大壩旁有紅葉,而且喺出囗處原來仲有個「兒童研習徑」。有好多花花草草,如果同小朋友嚟記得唔好錯過!

原文: http://michelleleelam.blogspot.hk/2016/12/2.html

Comments (0)

Leave a reply

jfb_p_buttontext
Shares