盤點世界奇形怪狀寵物

盤點世界奇形怪狀寵物
15 May, 2018 ohmykids
In TrustMyKids, Articles

【以下介紹純屬奇趣分享,絕對唔希望大家犯法/破壞生態或環境/未深思熟慮就去養任何寵物。一生嘅承諾絕對要慎重及認真對待。: )】

你家細路係咪無昆蟲動物不歡?今個星期為大家介紹 5 樣騎呢寵物,大家又見過未?!

1)【Hea 之達人】水豚 Capybara

來自南美洲嘅水豚,係豚鼠同賓尼兔嘅遠房親戚,亦係全世界最大嚙齒科動物。”Capybara”喺南美原住民語言嘅意思係「草原支配者」,草係佢哋嘅主食。近年因為日本動物園引入令水豚人氣急升,一副天然呆樣儲落唔少粉絲!據講日本天皇二仔秋筱宮親王都養咗一隻。

水豚每日只做三件事:食、bathtub、瞓覺(有時仲會浸浸吓瞓著咗,好搞笑!)。移居日本嘅「水豚君」夏天會長期浸喺水入面消暑做 SPA;冬天會浸溫泉,冬至時更會跟足日本人傳統浸柚子浴,祈求來年「不感冒、不生病」,認真識嘆~

水豚 fun facts
-哺乳類
-平均壽命 5 至 10 年
-睇起笨重,但最高時速可達 50 公里
-素食主義者
-最愛食物:草、西瓜
-天生愛水,需要好大地方活動同游水
-性格溫和友善,熱愛社交,同好多動物都做到好朋友


即睇水豚日常

2) 【天生有對招風耳】耳廓狐 Fennec Fox

有對招牌大耳嘅耳廓狐係全世界最細粒嘅犬科動物,體形同貓差唔多,身長只有 24-40cm,係北非撒哈拉同西亞沙漠一帶嘅原居民。夜晚你瞓覺時就係佢哋嘅 party time。覺得佢個樣熟口熟面?無錯,《動物方城市》(Zootopia)Finnick 就係以耳廓狐為藍本創作嘅角色!

佢哋耳仔大大有咩用?除咗散熱外,原來聽覺好敏銳,足以聽到地下微弱嘅獵物活動聲音。野生耳廓狐鐘意喺沙丘築巢,佢哋嘅洞穴屋企有 120 平方米大及多達 15 個出入口,有部分仲會通去其他同伴嘅屋企添!

耳廓狐 fun facts
-哺乳類夜行動物
-野生耳廓狐平均壽命約 10 年
-最愛食物:齧齒動物如小鼠、昆蟲、鳥類同鳥蛋
-耳仔大大,細細聲都聽得到
-適應非洲等地炎熱乾旱氣候,可以喺冇流動水嘅地方生活,平日會將露水收集洞穴備用,有機會亦會直接飲水

即睇耳廓狐日常

3) 【現實版不老傳說】六角恐龍 Axolotl

原名墨西哥鈍口螈嘅野生六角恐龍非常罕有,只會喺墨西哥中部 Lake Xochimilco 同 Lake Chalco 搵到。因為係兩棲類,佢哋擁有喺水生活所需嘅鰓、蝌蚪型尾巴,及喺陸地上爬行用嘅手腳。六角恐龍缺乏甲狀腺荷爾蒙,大多數情況下,佢哋呢個 bb 樣會保持不變,由幼體發育到性成熟期間唔會經歷變態。最神奇嘅特性係呢隻六角恐龍擁有極快嘅自癒能力,可以自行長出受損四肢或器官如腦部。呢兩個神秘特性令佢哋成為好多科學家嘅研究對象。

IUCN 紅色名錄內,六角恐龍原生種被評為極危物種,原棲地已不多於 10 平方公里,大家都要一齊好好保護佢哋!

六角恐龍 fun facts
-夜行動物
-兩棲類
-平均壽命約 15 年
-最愛食物:昆蟲、小魚、水藻及少量魚類嘅便便
-成熟六角恐龍可長到約 25cm 長
-游水唔叻,行動較緩慢
-新陳代謝極速,受傷後可以喺幾個月內重新長出肢體或器官,但速度會隨年齡減慢
-六角恐龍 bb 鐘意漂浮植物或擺設物,而成年六角恐龍就特別鐘意小洞穴
-如果發現佢浮出水面即代表感到壓力或者病咗
-一次可產超過 200 粒卵,屬於非常多產嘅物種

即睇六角恐龍日常

4) 【現存最古老爬行動物】大鱷龜 Macrochelys

鱷龜係世界最大嘅淡水龜之一,外貌奇特勁似史前生物!佢哋嚟自北美地區,因為人類睇中佢哋呈十字架形狀嘅胸甲,以致過份獵殺及失去棲息地,已被世界自然保護聯盟列成易危物種;同時受到《瀕危野生動植物種國際貿易公約》保護,限制其出口及國際貿易。

雖然佢哋唔會主動攻擊人類,但受到威脅時會咬人,鋒利鷹嘴能輕易咬斷大人手指、西瓜,甚至地拖棍!!!由於佢哋性格相對其他寵物兇殘+體形生長速度驚人,必須擁有豐富飼養知識同空間,並唔適合有小朋友嘅家庭飼養~

大鱷龜 fun facts
-夜行性
-雜食性,甚至係肉食性
-野生鱷龜壽命不明,但相信可達 150 歲,而人工飼養鱷龜一般有 20-70 歲
-因為頸短、頭又大又重,鱷龜頭部不能完全縮入殼內
-紀錄上最重嘅鱷龜達 236 磅
-最愛食物:魚,幾乎任何肉類,亦有能力獵食體形細小鱷魚
-每次浮出水面吸氣後,能潛水 40-50 分鐘 -鱷龜只有生蛋/曬太陽時才會走到陸上

即睇大鱷龜日常

5) 【蟲界偽裝高手】葉脩 Phyllium bioculatum

葉脩(音:修),又叫葉子蟲,係名副其實昆蟲界嘅扮嘢大師!有啲似新葉,有啲就似枯葉,隻隻腹部表面都有葉脈狀紋理,加上黑色、黃褐邊或模仿蟲蛀嘅斑,行路姿勢又似足被風吹嘅葉咁搖搖擺擺,唔講都幾難發現到。呢個就係佢哋喺大自然保護自己嘅方法,非常有趣!

葉脩生活喺有茂密森林嘅熱帶同亞熱帶地區,中國雲南、福建、印尼、馬來西亞等地都會搵到佢哋嘅縱影。

葉脩 fun facts
-竹節蟲科,夜行性昆蟲
-平均壽命約 7-8 個月
-成蟲體長 8-10cm
-最愛食物:番石榴、橡樹、玫瑰或芒果嘅葉
-有兩種生殖方法:由雌性單性繁殖,所生嘅 bb 全部都會係雌性;而雌雄交配下所生嘅下一代就會有男仔同女仔

即睇葉脩日常

 

「寵物唔係你嘅全部,但你就係寵物嘅全部」,一旦決定就千萬唔可以棄養。唔係每樣動物都適合喺屋企養,除咗確保能提供足夠活動空間及時間照顧,亦要注意你居住嘅地方係咪合法飼養該動物,事前務必 check 清楚、考慮清楚!符合以下條件,你就擁有飼養寵物嘅基本資格~

小主人 check box:
1. 經過家人同意 ○
2. 準備好照顧寵物一生(由 5 至 50 年不等,甚至更長)○
3. 知道咩寵物適合自己 ○
4. 知道照顧該寵物嘅所有須知 ○
5. 家庭有能力負擔寵物嘅飼料、用品及醫療開支等 ○
6. 可以為寵物提供舒適嘅居住環境 ○
7. 每日有時間陪伴寵物,如玩耍、出外散步 ○
8. 願意幫寵物清潔、處理大小便 ○
9. check埋係咪合法飼養 ○
10. 領養行先 ○

立即睇睇【相信孩子學會】026 照顧小生命挑戰詳情 >>

Photo credits: 伊豆シャボテン動物公園, atpress.ne.jp, kuaibao, bz55.com, APA/AGRARIUM, Ambystoma mexicanum, blog.xuite.net/shura, Simona Gosi

Comments (0)

Leave a reply

jfb_p_buttontext
Shares