il papa

il papa
9 March, 2015 La mamma

20141029_203723

LUCA爸唔係一個傳統嘅爸爸

佢好似餵過5次奶左右(我全人奶,就算有時BB飲冰奶,都會係我餵。。。)
大約換過5﹣6次片 (日頭要做嘢,夜晚我要起身餵奶,所以順便換埋片)
只係幫阿仔沖過一次涼 (阿仔沖涼時間係6點幾,佢仲做緊嘢,所以都係我,嗰次係因為唔知我突然間有啲咩做,就叫佢試下幫阿仔沖涼,順便睇下佢搞唔搞得點。。。點知佢又得喎)

放假唔會去行商場,因為佢最唔鍾意迫人嘅地方
如無需要,佢係唔會出銅鑼灣
佢又唔鍾意影相,叫親佢同我地影相,佢都係hea下我就算
有時望到啲香港爸爸,會覺得佢好唔同!完全唔湊仔嘅,人地啲老公,個個都落手落腳,親力親為
但又可能因為咁,我同老公從來都無為過湊仔或教仔而嘈過

雖然係咁,但佢有佢嘅魅力令到仔仔勁愛佢
就係因為爸爸係一個大細路!!佢超受小朋友歡迎,我啲姪仔姪女,姨生仔姨生女。。個個都好鍾意同佢玩
而呢個爸爸成日同阿仔玩埋啲好無聊但又好搞笑嘅遊戲,每次都搞到仔仔笑唔收唔到聲
唔知係咪少做所以矜貴, 佢每一次同仔仔嘅互動,我都覺得好珍貴,所以我咁記得佢餵過幾次奶,換過幾次片,沖過幾次涼
但佢令仔仔笑嘅次數,我就真係點數都數唔到

佢可能唔係一個會幫手湊仔嘅爸爸,但佢絕對係一個可以同仔仔當朋友嘅爸爸
仔仔每次換完衫,每次學識講一個字,每次學識做一個動作,每次見到有動物
佢都一定會跑去爸爸到,問爸爸佢靚唔靚,講比爸爸聽,做比爸爸睇
出街瞓覺前一定要錫啖爸爸先!
有幾次仔仔同住佢講咗一堆唔明嘅說話,Luca爸感動到淚滿盈眶 (好似望住個女出嫁咁)
呢個畫面真係好珍貴,好感人

有時我都想做佢個位, the fun one…但父母當中梗係要有一個佢惡啲先可以治到佢
而我,就係嗰個辣媽!

 

 

Comments (0)

Leave a reply