「我沒有選擇」

「我沒有選擇」
14 November, 2015 家長匯習

晚飯後,我和老二坐在飯枱前閒談,他滔滔不絕地跟我談前路,談理想,更將自己心中的計劃和决定娓娓道來。
「你是否肯定自己真的想走音樂路?」
「是!」二話不說就回應。
「行音樂路你會好孤單同埋好寂寞架!」
「我知道!」點頭
「你可以耐得住嗎?」
「…」默而不語。
「你似乎有D難處… 」
「哇!…」大哭起來。
「係一個好難嘅選擇?」
「嗚!嗚!… 我冇得選擇…」大聲地哭。
「可唔可以話俾我聽冇得選擇嘅原因呀?」
「…」仍在痛哭。
「…」
「我唔可以好似哥哥咁冇朋友!…」
「你想好似而家咁有咁多朋友,但係又想走音樂路?…」
「係呀!嗚!嗚!嗚!… 但係走音樂路唔可以有朋友… 嗚!嗚!…」
「你覺得唔可以二者兼得?…」
「一日要練咁多個鐘,點可以有朋友…」邊講邊抹眼淚。
「我知道朋友對你好重要,你唔想冇咗佢哋…」
「唔!」邊點頭邊回應。
「真係一個好難嘅選擇…」
「唔!…」
「咁唔揀大提琴揀朋友,你又點睇呢?…」
「我唔可以唔揀大提琴呀!嗚!嗚!… 我冇得選擇…」
「你話你唔可以唔揀大提琴,所以,就會冇晒朋友,不過,若果真係你嘅好朋友,佢哋一定會支持你嘅選擇嘅!…」
「…」
「如果將練琴同埋同朋友共聚嘅時間表安排好,練琴嘅時候全情投入去練,練到夠為止;同朋友一齊嘅時候就盡情享受一齊開心嘅時刻,你又覺得可唔可行呢?」
「…」
「…」

老二似乎已經决定要跟哥哥一樣走音樂之路,卻因「朋友」而陷入兩難,難得他肯跟我傾談,我當然樂於聆聽。能陪伴青少子女走過人生的暴風時期,實在是我們的福氣和榮幸,雖然過程中困難重重,但這也是鍛煉父母耐力的最佳時機,期盼我們能抓緊機遇,珍惜與孩子一起走過的這段人生歲月!

Comments (0)

Leave a reply