【週末郊遊】西貢獅子會自然教育中心

【週末郊遊】西貢獅子會自然教育中心
28 December, 2017 梨子林
Avatar
In Articles, Blog, 梨子林
位於西貢蕉坑特別地區嘅獅子會自然教育中心,前身係建於五十年代嘅政府實驗農場,於1986年關閉,再得國際獅子會基金撥捐經費,後於1991年重開,現由漁農署管理。中心入面有多個室內展館,包括昆蟲館、貝殻館等,亦有室外嘅地質公園,同自然教育徑,可謂老少咸宜。
是日週六,秋高氣爽,因為係即興節目,出門比較遲,到達中心時差不多12點,停車場已泊滿,而且有車排隊。所以如果駕車前往,最好早啲。漁農署網頁亦有介紹其他交通工具: http://www.afcd.gov.hk/tc_chi/country/cou_lea/cou_lea_ven/lions.html

園內分唔同區域,好多地方都適合野餐。

涼亭、水池,幾舒服㗎!

處處可見蝴蝶⋯

因為都幾熱,諗住先入貝殼館過吓冷河,點知冷氣居然壞咗!貝殼嘅品種都唔少,但太熱啦,我哋只係走馬看花。

之後經過嘅係一個小型岩石公園,放咗唔同類型嘅石頭。

因為開始肚餓,爸爸係咁催去食飯⋯ 於是我哋沿路行,又經過一片農田。

到了!依度嘅唯一一間餐廳叫「聰鳴茶座」,顧名思義,係一間為聽障人士提供就業機會嘅餐廳,所以爸爸一路行一路解釋比哥哥聽。

聰鳴茶座嘅環境舒適,食物種類都唔少。

嘩!好豐富!蕃茄牛尾飯簡直超水準!哥哥嘅香蕉奶昔亦非常新鮮。

食飽飽,我哋繼續行,後面係中藥園,好多平日曬乾嘅藥材依度見到新鮮嘅草藥原貎,好特別!

點解佬佬連怕醜草都會驚嘅?

下一站係昆蟲館。

有少量標本,有文字介紹,仲有電視睇。

行出兩步路,有一間網屋,不過冇咩睇頭。

田園、菜園、涼亭、荷花池。

好大隻速織(Katydid),紅色嘅蜻蜒!兩個小朋友好鍾意依度咁多昆蟲。

最後,終於揾到自然教育徑。入口處有幾隻大皇蜂,兩個又大叫一陣先再上路!

但依條徑有啲問題,就係好多泥路,加上尋日落雨,行起嚟要好小心,金睛火眼望住地下,唔係太欣賞到風景!

其實可能自然教育徑嘅另一段會好啲,但婆婆已經投降了,哈哈!😂 於是,我哋慢慢離開,沿路有好多美麗植物。

漁農處獅子會自然教育中心,好啱一家大細亦可以玩足一日。

 

原文: http://michelleleelam.blogspot.hk/2017/03/3.html

Comments (0)

Leave a reply