【阿囡小一上學記】(七) 家長分享:生果論

【阿囡小一上學記】(七) 家長分享:生果論
16 November, 2018 好校爸
好校爸
In Articles, Blog, 好校爸

話咁快就一個學段結束;覺得自己仍然係未適應到「阿囡返左成個學段仲適應緊」既事實。學校咁啱攪左一個家長晚會請左學校社工同埋兩位較資深既家長(即係個仔、囡已經讀緊較高年級)同我地分享下佢地既經驗,於是放工就返左去學校度偷下師。

放工去到學校已經過左7:30,社工黎姑娘已經開始分享緊佢開學以來對一年級同學既觀察:可能因為今年有好多弟弟妹妹入學,大部分小一既同學都適應得好好,好似已經好熟間學校咁樣。不過,黎姑娘仍然勸勉家長們事不宜「早」 – 不宜過早完全放手,小朋友其實仲需要時間適應同埋家長既幫手。聽完有少少覺得正中要害。

之後就輪到兩位資深既家長同大家分享佢地既實戰經驗,內容生動貼地又攪笑(我發覺呢間學校無論校長、教職員以至啲家長都幾有幽默感…唔知各位同學仔家長同意嗎?)。其中一位家長既分享更加令我印象深刻。

呢一位分享既家長有一個小朋友,今年已經啱啱上左中學部。佢既分享主要圍繞我地作為家長應該用咩心態面對子女既學習同適應問題 – 簡單啲講,就係「睇開啲」。

佢舉左一系列係小一同學身上會發生既事,大家不妨睇下你既小朋友中左幾多樣:

  • 佢係咪個書包亂到七彩、啲工作紙啲角梅晒、書同作業好似垃圾一樣?
  • 係咪一到測驗,你就要係WhatsApp度「尋找worksheet的故事」?
  • 係咪默書測驗明明讀左,轉頭默完測完返黎又完全唔識?
  • 係咪測驗果陣明明有提供答案,但佢照抄都抄錯?

我覺得自己好似去睇相果陣比個算命佬不斷講中我既心事一樣。

呢個時候呢位家長同大家講唔好氣餒同勞氣 – 因為個個小朋友都係咁。千祈唔好以為係因為佢地唔專心,又或者以為你不斷咁蛾佢check多十次佢就會識得做返啱。其實呢個可能同年紀比較有關係,以佢既經驗,小一比careless mistakes扣你10幾20分真係閒閒地,但上到三、四年級你會睇到佢有明顯地改善。

當然,當你發現佢身邊有同學仔做得到或者做得比佢好果時,你未必可以咁從容面對。例如呢位家長話佢有一次係學校lunch做義工果陣見到佢個仔,從佢個仔既嘴角能清楚分辦出佢果日係食茄汁飯 – 果一刻佢心諗:點解佢隔離位個同學咁乾淨又拎晒紙巾抺,但我個仔咁樣架…

只要你一開始比較,你就越睇佢越唔順眼。不過空談「唔好比較」又實在係無用,人之常情嘛。

於是呢位家長就提出一個我稱之為「生果論」既方法比大家平衡返個情緒。

「生果論」就係你要當所有小朋友都係生果。生果係一個種類,但每一種生果都唔一樣;你唔會拎個蘋果同個橙黎比較邊個好啲,所以同樣道理你唔應該拎你個小朋友同人地比較。

每當佢火遮眼睇自己小朋友唔順眼既時候,佢就同自己講:「我個仔係榴連……我個仔係榴連……」。講完諗完,個心多多少少舒服一點。

到底實質去到我火遮眼果陣我仲可唔可以咁冷靜咁將佢有如生果般對待我就不得而知。不過我倒係有認真思考:如果阿囡係一個生果,佢係咩生果呢?

就呢事我決定問返當事人。

我:你覺得自己似邊樣生果?

囡:提子囉。

我:點解呢?

囡:因為我好甜囉。

雖然自己做爸爸既心入面十二萬分支持呢個答案,不過把口都係講左句:女仔黎架矜持少少唔好咁講嘛……


更多好校爸內容:

Comments (0)

Leave a reply