【阿囡小一上學記】(九) 尋找worksheet的故事

【阿囡小一上學記】(九) 尋找worksheet的故事
26 November, 2018 好校爸
好校爸
In Articles, Blog, 好校爸

(鐘sir腔):係好耐好耐之前,人類發明左紙。

然後過左好多好多年,人類發明左工作紙。

正如某電視節目話「有土地既地方就有中國人」一樣,有香港學生既地方,就有工作紙。

今集我地唔駛千里迢迢走到世界遍遠角落,近近地係我屋企搵到呢位小女孩-即係我個囡,睇下佢既「尋找worksheet的故事」。


小女孩同好多香港既小朋友一樣,每日過住繁忙既生活。每日放學打開書包,小女孩取出當日既功課,就會見到一張又一張既工作紙:有中文、英文、社會、科學;有溫習紙、生字練習、習作,林林種種。

每一張工作紙都有佢既故事。紙上殘留未擦透既筆痕,隱晦地留下左小女孩同家長之前搏鬥既痕跡;縱橫交錯既摺痕,梅梅爛欄既紙角,立體地呈現小女孩如何將佢地「質」入書包,活生生地表現何謂「夾硬黎」。

偶爾,工作紙過住漂泊既生活。小女孩既學校有兩個folder – 一個bring home,一個bring school,奈何工作紙不時同自己真正既歸宿失之交臂 – bring school既有時bring home,bring home既有時bring school;而當工作紙終於放落啱既folder之時,又發現原來呢個folder係隔離位個同學既。


今日,小女孩如常放學拎出工作紙,但今日工作紙上出現嶄新既內容:「請將所有以前既中文工作紙整理好然後帶回學校」。

小女孩有少少茫然,大概無想像過當日收埋一邊既工作紙,竟然會有「出土」既一日。

小女孩既父親 – 即係我,默默地將一堆工作紙倒係枱面,然後開始同小女孩一齊跟住指引將中文工作紙分類。父親睇返教過既工作紙,回想起每次做功課同默書既嘔血往事;小女孩卻不以為意,依舊係「到底邊張先係識字紙呢」呢個問題上糾結。

兩個懷住截然不同想法既人,經過大半個鐘,終於將要尋找既工作紙整理好,放入文件夾裏面。小女孩露出滿意既笑容,父親如釋重負,慶幸至少未需要踏上Whatsapp尋紙呢條路。


就係咁,小女孩每一日繼續如常地係書包尋找佢既工作紙,父母繼續如常地係工作紙上尋找小女孩既錯處;大家繼續尋找一條快樂、自主既學習之路。

相信呢個故事,唔係小女孩一家獨有既故事。只要有香港既學生,就有工作紙,就會延續呢個「尋找worksheet的故事」。


更多好校爸內容:

Comments (2)

Pingbacks

  1. […] 小朋友聽完老師既講解,老師跟住就叫佢地拎左張紙出黎。遠睇見張紙上面有一個黑色圖案,然後猛然醒起之前同阿囡尋找worksheet 既時候有見過,類似咁既樣: […]

  2. […] 小朋友聽完老師既講解,老師跟住就叫佢地拎左張紙出黎。遠睇見張紙上面有一個黑色圖案,然後猛然醒起之前同阿囡尋找worksheet 既時候有見過,類似咁既樣: […]

Leave a reply