【阿囡小一上學記】(八) 校長:42日建立一個好習慣

【阿囡小一上學記】(八) 校長:42日建立一個好習慣
25 November, 2018 好校爸
好校爸
In Articles, Blog, 好校爸

上次聽完資深家長既分享之後,今次輪到曹校長主講家長晚會。

校長呢一晚既講題叫做:「Think BIG (part 1) 逆轉人生8大關鍵力」。佢要講既故事係關於美國一位叫Ben Carson既外科手術醫生- 一個輸在起跑線既黑人,憑咩逆轉人生成為人生贏家。

係講座其中一部分,校長分享點樣幫小朋友建立一個好習慣:

42日培養一個好習慣

中國人有句說話叫做「書香世代」。我地成日都諗住讀得書係有遺傳;校長讀書讀到博士,又由大學教到中學再到小學,佢既小朋友讀書實無問題啦。

不過原來現實並非如此。

校長話佢個仔不知留過幾多次級;自己去學校見家長都無同人講過自己教書既,更加無質問過學校點解教到自己個仔咁渣。

校長當時都唔明白:自己同太太都好鐘意讀書,點解個仔咁憎讀書?點解無遺傳到佢地既讀書興趣同能力?屋企既學習氛圍又咁好,點解佢都係唔得?

後來校長一次機緣巧合:半夜起身要去廁所,終於發現阿仔其中一個讀唔到書既秘密,原來係源自一個壞習慣 – 佢個仔每晚半夜都會走落街「自遊行」- 同公園啲麻甩佬傾計、操啤牌,攪到通宵達旦,梗係無心機無精神讀書啦。

校長為左戎除呢個惡習,就算心入面一百個唔願意,佢都同左阿仔講:如果你以後想落街「自遊行」,唔理幾夜都好,你預埋我,我同你一齊落去!

校長仲為左提醒佢個仔呢個承諾,係阿仔個衣櫃貼左張紙寫住:「心理學家話改變一個習慣要42日,你記得想落街就叫醒我,我同你一齊落街!」。

經過左約40日既考驗,最終校長幫佢個仔成功戎除呢鋪半夜落街癮。

要持續地、敏銳地做一樣好東西

校長話要建立一個好習慣,除左要持續地(42日)進行,仲要敏銳地進行。

何謂敏銳地進行?

校長舉左一個例子:假設你成日同你老婆鬥氣,講野尖酸刻薄;如果要改變呢個習慣,除左你要每日都記得唔好講野「糟質」你老婆之外,更重要既係你要敏銳地去理解下到底你同老婆講既野係咪一句刻薄既說話。

如果明明你係串緊你老婆,但你自己都渾然不覺,咁比你持續42日都無用啦 – 須知我地鬥嘴唔係刷牙洗面,一日唔只兩劑咁少架嘛。

聽完校長既分享,心諗大鑊了。

如果我想阿囡養成做功課做快啲既習慣,假設今日開始,過42日咪即係差不多要等到佢學期尾佢先「修成正果」?但跟住又放聖誔假了,咁咪即係無得「持續地」?

不過我諗真正難既其實係要阿囡「敏銳地」覺得自己做得慢吧,如果唔係宜家點會大部分時間都只係得我同老婆「過敏地」乾著急多啲呢?


更多好校爸內容:

Comments (0)

Leave a reply