【阿囡小一上學記】(六) Season 1 finale:兩默一測的最後一星期

【阿囡小一上學記】(六) Season 1 finale:兩默一測的最後一星期
11 November, 2018 好校爸
好校爸
In Articles, Blog, 好校爸

你無睇錯,真係season 1 finale。

阿囡間學校全年分開5個學期(佢地叫做學段),10月尾第一個學段就已經完結。我到宜家都仲覺得我好似去食buffet果陣啱啱拎左一碟沙律,個waiter就埋黎同我講話last order咁樣。

話明係season finale,點都有少少高潮。個高潮就係:默兩次書,測一次驗。

你可能會話:下,阿仔間學校個個星期都係咁上下啦。然而對阿囡間學校黎講,呢個一定唔係佢地平時既workload – 開學到宜家每個星期最多只會默一次書,中、英文科有默契唔會一齊黎,正式測驗更加係從未有過。

經歷上次同阿囡溫習英文默書,忍唔住諗:唔知今次阿囡既化功大法會唔會更上一層樓呢?

星期四已經同阿囡講定星期五放學盡量清左啲功課,因為星期六、日都有活動,好希望佢善用時間,星期六用少少時間溫習下星期日全日玩。奈何現實還是不似預期,阿囡既慢條斯理再加埋星期六外出左成日,結果攪到星期六晚先有時間同阿囡開始溫習。

今次既英文默書照樣默6個生字加4句簡單句子。 同阿囡溫左陣幫佢默,結果啱左一半,同時發現佢已經開始掌握到化功大法第二層既要領 – 就係將上次默書學識既野忘記。同阿囡再溫,明白要試下唔同方法;雖然自己無正式接受過phonics訓練,但即管試下同佢將啲字拆開咁幫佢記。

阿囡以前幼稚園學過下phonics,好快就明白而且顯得信心滿滿,仲誇下一句:我識串house咁咪識串埋blouse囉 (blouse係其中一個要默既字) !

見佢信心爆棚個樣,於是又同佢默多一次。結果係……佢完美咁重現返佢第一次默錯果時既串法。

我:「咦,你頭先咪話識得串house就識串blouse既? 」

囡 (理直氣壯mode):「哦,因為原來我唔識串house囉」

見佢理直氣壯答我果個樣,真係唔知好嬲定好笑。我忍住想炳佢既衝動,深深吸左一口氣。

冷靜下來後覺得自己有如忽然開竅,跟手就問阿囡:「咁Mickey Mouse個mouse你又識唔識先?」

阿囡爽快地答話:「梗係識啦!」

然後,blouse字就攪掂了。乘住呢個氣勢,兩三下英文默書就攪掂了。我果一刻係直情想寫信去Disney多謝佢地創造左Mickey Mouse呢個角色。

信心影響一切。之後同佢默中文,一take pass。見有時間即刻同佢溫埋社會測驗,發現學校其實無意要小朋友死記住啲fact或者啲字,只要佢地理解到個內容,測驗時會提供詞語比佢跟住寫。

最終用左一個鐘頭,就溫晒3樣野,諗起都覺得不可思議。而我亦終於出左係屋企失傳已久既一陽指比阿囡:

忽然諗起當年香港撒瑪利亞會既一句:「窮途未必係末路,絕境也可以逢生」。唔知寫呢句野果個人係咪同佢個囡默完書之後得到啟發寫既呢,咁中既?


更多好校爸內容:

Comments (0)

Leave a reply