默書分數的啟示

默書分數的啟示
8 November, 2018 辣椒媽媽
In Articles, Blog, 辣椒媽媽

十一月又過了一星期,意味著兒子入讀小學已經有十星期多,學校隔星期默中英默書的安排,的確令我們母子二人養成每天一起溫習的習慣。然而,我必須讓孩子知道,努力溫書還努力溫書,成績好還成績好,兩者帶有關係卻又不盡是直接的關係,無論如何,想獲取好成績的話,就要努力溫書。

回想上星期,我們一起努力溫習過的中文默書,今日兒子收到了成績,結果卻不如理想,只有69分。他望着目錄寫著的分數,第一次95分;第二次85分;今次69分,竟然說了出口:「媽媽,點解我中文默書越嚟越低分嘅?」

我回答:「默書範圍越來越多,要識嘅字越嚟越深,攞高分嘅難度就會越來越高,可能上次我哋溫得未夠熟,不如我地諗過個好方法温習丫!我見到你今次默書有好幾個字擦咗冇寫返,究竟點解呀?如果你唔寫返落去,老師就當你唔識,每個錯字要扣5分。」

他說:「我明明識,但係忽然唔記得點寫,老師收咗簿之後其實我就記得點寫⋯⋯」從他的表情,我看得出他十分失望。

我鼓勵他:「其實媽媽細個都成日係咁,明明已經溫曬書,但係偏偏默書嘅時候就唔記得咗,媽媽知道,而家你一定好唔開心喇。」

得到我嘅體諒,明顯地他紓解了,他把頭擁進我懷內,然後露出他燦爛的笑容望着我說:「咁我哋下次努力溫中文啦,好想有100分然後拎到老師嘅貼紙㗎!我覺得今日嘅英文默書會有一百分,因為我真係識晒!」

難得你在意自己的分數正在倒退中,我實在感到高興。既然我親眼見到你曾經努力溫習,如今即使看到你獲得嘅成績不太理想,其實我何須介懷?畢竟,求學之路遙遙,什麼也可以輸,唯獨信心和意志不可以輸,此兩者要成功建立,父母無條件的鼓勵實在非常重要。

永遠緊記,孩子身心健康才是我的初心。

Comments (0)

Leave a reply