【阿囡小一上學記】(十二) 朗誦比賽的收穫

【阿囡小一上學記】(十二) 朗誦比賽的收穫
8 January, 2019 好校爸
好校爸
In Articles, Blog, 好校爸

由細到大都唔係好鐘意朗誦,總覺得聽人朗誦果陣好有感情咁讀啲字出黎,就好似聽一個唔識唱歌既人唱K咁。

所以當年幼稚園揀阿囡去參加朗誦比賽自己係有少少抗拒。不過自從阿囡參加過朗誦比賽之後,的確覺得佢信心大左同大膽左,所以後來亦慢慢放下左呢一種偏見。

學校早排派通告話可以報名香港學校朗誦節既比賽,阿囡話佢都想參加,於是就幫佢報左名參賽。學校唔會係上堂時間同你練習,阿囡只有係小息時間約老師同佢練習,所以真正練習既任務落左係屋企度,老婆結果成為阿囡既「主教練」。

終於到左比賽日,去到比賽場地度見到好多唔同學校既學生參加比賽,呢個時候就發現阿囡件Polo Shirt校服真係與別不同 。我諗在場見到佢既都會以為佢係著錯件體育衫黎比賽。

踏入比賽禮堂後,所有參賽者分兩批坐好,家長就要坐係後排。主持再三叮囑唔可以出聲唔可以用電話,令肅靜既會場加多左幾分緊張感。

叮一聲,第一位參賽者出場了。參賽者朗讀既內容,同阿囡過去幾個星期係屋企不停重複既內容一樣,眼看仲有成二、三十個參賽者,不由得有一陣納悶 – 去唱K連續唱同一隻歌三十次,點頂呀?

第一位參賽者有少少緊張,不過實在難怪,畢竟成個會場既氣氛,令我覺得有如置身法庭。係呢個緊張感不斷提升既環境下,參賽者陸續跟隨叮叮聲出場。見到有啲參賽者既精彩表現真係令人咋舌,有時又會為緊張得忘記誦材既小朋友深感同情同打氣。

終於到阿囡出場了。

阿囡慢慢走到台上既十字,微微向老師躹躬然後開始。阿囡一開聲令我為之一振 ,因為之前幾位參賽者咁啱都唔算好大聲,慶幸佢洪亮既聲線帶黎好開始,同時心諗:叫你同人打招呼又無咁大聲。阿囡既聲音繼續帶動要訴說既故事;句與句既停頓、幾時大聲細聲,之前老婆話左好多次都無做到既野忽然一一做到。睇到表現同之前練習判若兩人既佢,不得不承認今次係佢超水準既演出。

平心而論,儘管阿囡表現超水準,根據觀察其他參賽者既表現,佢要問鼎三甲恐怕機會都係好微。不過比賽完結接返阿囡既時候我都係難掩興奮既心情,為佢既表現擊節讚賞,佢亦對自己既表現滿意。

主持先請評判同大家講下佢對同學既表現有乜感想。評判講出幾個重點,認為小朋友朗誦應該保持童真,好好運用聲線,更要了解故事既內容先能夠突圍而出。

評判終於公怖得獎名單,一如預期,阿囡最終三甲不入。老師跟住向同學派發分紙,攞到一睇,原來阿囡爭第三名一分。

睇到阿囡賣力、出色既表現,覺得爭一分有少少可惜。離開既路上,我問阿囡覺得呢次比賽點樣,心情如何。

佢既答案比起佢朗誦既表現更出乎我意料。

佢話其實當評判講緊有邊啲位大部分同學做得唔夠好時,佢已經預計贏唔到了,因為自知做唔到評判所講既某啲要求。失望的確有,不過佢下年仍然希望繼續參加呢個比賽。

我定神望一望阿囡,見佢神色自若面露笑容,似乎口中所講並非大話。面對如此冷靜對待賽果既佢,發覺自己正想開啟既「安慰mode」顯然係多餘了。

原來不知不覺間 – 係我覺得阿囡仲迷失於小一新環境同佢啲worksheet既同時,佢的確成熟了。或者呢個先係今次朗誦比賽我同佢既最大收穫吧。我地帶住滿足既心情,一齊返屋企向「主教練」滙報我地今日充實既經歷。


更多好校爸內容:

Comments (0)

Leave a reply