繼續講攰之神奇女俠最強後盾

繼續講攰之神奇女俠最強後盾
10 July, 2019 Esther Chu
Avatar
In Articles, Blog, Esther Chu

琴日嘅文章得到好多媽媽認同,當然啦,因為係大部份媽媽嘅心聲。

對於我作為阿媽嚟講,神奇女俠嘅至高境界唔係攰住湊細路,係病咗都仍然可以湊住佢哋。

我記得,我兩粒仔仲細餵緊人奶嘅時候,我同自己講,一定唔可以病,因為餵人奶冇得代勞,我亦無儲住啲人奶,病住湊仔係十级辛苦嘅事情,各位阿媽應該好清楚。

不過,人總會病,雖然我好少病,不過,病親都好甘。有幾次我感冒發燒,攰到四肢冇力,癱瘓喺張床上邊,但當個仔要黐住亞媽飲奶,唔知從邊度黎嘅力量,總係可以撐住去滿足亞仔嘅需要。就算攰到發慌,都可以彈起身同佢玩。

神奇女俠就係咁樣煉成,而DC漫畫中嘅神奇女俠係來自亞馬遜嘅戰士公主,擁有超人級嘅力量、速度、持久力。當我地願意接受阿媽呢份工作,戰士訓練立即展開,捱過咗之後,就真係冇乜嘢做唔到啦!

其實,有人認為,亞媽病咗,BB響旁邊都可以休息,反正BB都係瞓覺啫。其實唔係,因為我哋係神奇女俠嚟㗎嘛,病咗都係,要預備隨時拯救世界,所以當BB係隔離,就算我哋幾辛苦幾攰,都會記掛住自己嘅小朋友,例如佢有冇蓋好被?使唔使換片…….等濕濕碎碎事情,即係會冇覺好瞓😰😰😰

所以,識做嘅老公,響老婆病嘅時候,最好就係帶仔女離一離開現場,或者幫手抱住BB唔好騷擾到個阿媽,總之要有一段可以真係俾媽媽瞓到覺唔使擔心仔女嘅時間。咁樣,媽媽先至可以舒舒服服休息。
(其實丈夫病都係一樣,我都會帶啲仔女離開現場,儘量唔好比啲仔女煩到佢,咁樣佢就會快啲好返)

記住,神奇女俠電影裏面,當佢最需要Steve嘅時候,Steve 拎住鐵板即刻出現,並且大叫「Shield」,咁就成為咗幫助神奇女俠嘅最強後盾。

最初照顧小朋友果一兩年,媽媽係好主要嘅照顧者,好多兒童心理學家都講過,頭一兩年仔女黐住媽媽係好健康同仔正常,但係神奇女俠都唔可以冇咗個最強後盾,爸爸嘅支持係非常重要,我哋D好攰嘅媽媽好需要老公隨時出嚟Shield,幫我地頂住。我哋只不過需要唞一唞,啲功力就會好快返番晒黎,繼續拯救世界。

後盾爸爸,睇到呢篇文章就識做啦!各位神奇女俠,繼續努力,江湖見!😘😘😘

Comments (0)

Leave a reply