阿媽係唔會唔攰

阿媽係唔會唔攰
9 July, 2019 Esther Chu
Avatar
In Articles, Blog, Esther Chu

最近,超級忙,除咗要做平日嘅工作,暑期仲有好多額外嘅工作要安排,又要照顧已經放緊暑假嘅兩粒仔,幾乎每日由朝到晚都係預備緊第日同埋下星期嘅工作,好似永遠都預備唔完,真係有種攰到想喊嘅感覺。

前幾日,去探一個啱啱生咗BB嘅朋友,由於係佢嘅第一胎,十分唔慣,呢位新手亞媽由朝到晚都要餵奶,個樣攰到有啲震驚,可能冇想像到做亞媽可以咁攰。

於是,我叫另一個好有經驗嘅媽媽朋友鼓勵呢位啱啱生咗BB嘅共同朋友,呢位媽媽朋友半年前生咗第三個仔,由於呢個BB斤両十足,佢由朝抱當晚,抱到腰痛,最佩服係佢自己湊3件,冇工人姐姐,所有嘢一腳踢,非常犀利。佢話俾我知,佢都經常攰到冇樣,亦都試過攰到喊。

所以,我好明,做阿媽係唔會唔攰,只會更攰😭😭😭

不過,要做嘢或要照顧仔女嘅時候,阿媽可以立即變臉,好似神奇女俠變身一樣,忽然有股唔知響邊度走出嚟力量,可以精神奕奕咁應付當前嘅任務,真係好神奇。

因此,好多人唔覺得D阿媽好攰。其實,只不過D亞媽適應咗果D攰,加上佢要無時無刻着住佢套神奇女俠戰衣,準備拯救世界,如果你唔係瞓係佢隔離,你係唔會見到佢個攰樣。

老實講,如果可以嘅話,媽媽們不知幾想除咗嗰套戰衣、搵過無人騷擾嘅地方上下網、瞓下覺,因為佢地真係攰到爆!

但係,呢啲攰代表住我哋對仔女無私嘅愛,媽媽嘅攰會成就仔女嘅成長,母愛嘅偉大在於此。

所以,各位好攰嘅偉大媽媽,尤其係暑假期間特別攰嘅神奇女俠,加油!如果有人可以幫你睇住一陣,記住要閃去抖抖,叉下電再繼續攰過,等啲仔女大咗,我地應該可以攰完。

講完,我要閃去抖抖😘

#係亞媽實明

Comments (0)

Leave a reply