【淺草食‧買‧玩】オレンジ通一番賞+昭和地道食堂+藏前玩具批街

【淺草食‧買‧玩】オレンジ通一番賞+昭和地道食堂+藏前玩具批街
3 October, 2019 大仁生活
Avatar
In Articles, Blog, 大仁生活

今次日本之旅其中半天便是走淺草逛逛玩玩食食. 原來我上一次來淺草的時間, 晴空塔還未落成 !! 😱😱

阿太:「咁你要唔要上Sky Tree 睇下?」; 我:「我又唔係想扮遊客, 手信一陣去玩具批發街買, 仲平仲正啦…唔去」

SY:「爸爸! 我想食比卡超雪糕呀@」特價600円兩球, 還有比卡超朱古力雜果賓治味特別版雪糕.

SY:「好清涼, 爸爸! 隻比卡超匙羹同隻夢夢杯我想帶返香港儲呀!」(垃圾佬就是這樣煉成的😅😅)

走出大街, SY即時大叫:「有Mario跑車呀?」; 我:「上次Do姐佢哋都有介紹過, 最衰我無車牌啦…我都有D想玩呀!」

阿太:「有人扮比卡超, 鬆弛熊, Eeyore添呀!」

 

SY:「不如我哋去食晏囉…好肚餓」…由雷門大景點位置向右行, 大約1-2分鐘, 有一條橫街命名為オレンジ通, 真的全條也是橙色的.

原來這條「橙通商店街」於2015年12年重建, 而且全條街也設置了大大小小的吉祥物. 不過, 最吸引到SY的,  就是今年4月才開幕的 Sanrio 「Sanrio Gift Gate 淺草店」.

阿太:「 嘩! 好大個Hello Kitty呀, (2層樓咁高)」於是有小朋友就走了入這兩層高的名店, 逛了大半小時也不願離去.

小朋友買布甸狗買得不亦樂乎, 阿太幫朋友抽Melody一番獎, 可惜抽不到獨立一款Melody, 只是一個印滿Sanrio角色的小挽袋.

 

 

離開Sanrio Gift Gate, 向前走大約1分鐘, 左轉便是「淺草一丁目」的橫街.

再向前走走便見到「Rox Dome Game & Sports 」遊戲店. 店前有一間洋食堂ヨツカミ, 只要你站在洋食店向前望, 便會見到今次我們推介的「水口食堂」.

 

食堂於1950年開業, 裝修還保留著當年的情懷, 絶對是體驗昭和風情及生活的一個的好去處!

古老大眾食堂的牆壁是掛著手寫的菜單, 一走進店內便已有穿過叮噹時光機的感覺, 一秒重返回憶中的美好時光一樣.

我們點了三款定食, 如果點少飯還可以減50円, 店員姨姨會問我們麵豉湯要吃豆腐嗎? 我們點頭, 結果, 加了多多的, 充滿豆味的美味頭廚粒給我們享用. 感覺很溫暖.

 

SY指定要吃漢堡扒定食 (1100円); 阿太則點了 漬燒吞拿魚定食 (930円) 及 いり豚~炒豬肉定食 (930円)

超腍的漢堡扒, 肉嫩又有肉汁,  SY:「好食過我哋暑假去會展食嗰件漢堡扒10倍呀!」(美食展從來難找到美食的啦)

我:「平時香港日系食肆通常畀片檸檬你加汁在漢堡扒上引味, 今日竟然係畀咗一大片橙我哋, 真係誠意十足」

而今款定食中, 我最愛這是其貌不揚的漬燒吞拿魚, 我沒有想到燒完的吞拿魚可以肉質還保留軟滑, 濃濃的魚肉味, 加入微微的Wasabi, 好好食.

阿太:「真係睇佢樣咁核突, 原來咁好食, 一D都唔老唔韌, 喜出望外」

 

不過, 水口食堂推介, 特製的醬汁炒豬肉片…因為加入了洋蔥及以咖哩風味來炒, 但味道太似我家樓下的洋蔥豬扒飯….可能經常吃, 吃得也有點厭, 對不起. ~ 英雄見慣亦常人

無論如何, 環境, 味道, 人情味也一流的地道小店, 非常令人回味… 推介~推介

話時話, 今次走到淺草, 發現有不少大隻型男集隊在雷門前, 找旅客去乘坐人力車,這來他們叫「俥夫」.

原來,  30分鐘淺草神社 –> 晴空塔 –> 橙通商店街 –> 返回至雷門前,  兩人同行 費用為9,000日圓.  雖然各「俥夫」也十足日版丁子朗的有型, 青春, 吸引, 但因為沒有乘坐的打算, 所以沒有查詢一家三口的價錢. (或者可能最多只能載2人也未定, 待有機會下次問一問吧)

之後, 就是今日重點活動, 藏前批發街看玩具…其實, 由雷門是可以步行至玩具批街的, 大約需時35分鐘-40分鐘, 但為了省時間, 我們選擇了乘坐一個站的都營淺草線, 大約10分鐘時間, 直達批街.

因為批街店舖, 平日大約17:00便關門, 所以建議可以早少少去逛逛. 藏前橋改札出口A1一出, 轉右便是第一間必去玩具手信店.

 

「おまつりらんど」專賣指頭, 面具, 氣球玩具等, 雖然只營批發, 但因為她們早己把所有玩具包好10-12件一袋, 所以, 只要你買2-3袋, 她們也十分樂意.

指頭 / 130 円 (一袋 1300円/10個) ; 面具/ 330円 (一袋3960円/12個) ;  氣球/ 100円 (一袋1000円/10個)

 

以最貴的面具來說也只是 330円 (約$23) 係為送禮手信簡直一流, 而且香港很少地方可以買到動漫指頭, 面具呢 ~正!!

另一得推介的批發玩具店便是「久保商店」, 這店有5層, 分別出售不同的種類的玩具.

不過商店只作批發, 不作零售,  即是每件玩具買2-3款, 假設如果與朋友合共一同購買, 又或者如同SY所說購買一箱爆旋陀螺, 價錢將會是零售價格的7折, 非常化算.

很可惜, 批街的玩具店多數不批准拍照, 所以只能拍攝門口給大家看. 大家有時間遊日本, 如果有機會到淺草也可以順路過藏前走走, 或者也有意想不到的收獲!

 

株式会社久保商店
〒111-0051 東京都台東区蔵前2丁目5-6 オレンヂビル
09:00 – 17:00
http://www.omocha.ne.jp/

㈱おまつりらんど
〒111-0051 東京都台東区蔵前2-3-4
09:00 – 17:30
http://omatsuriland.com/tenpogoanai

水口食堂
東京都台東區淺草2-4-9
10:00~21:30 (定休日 :星期三)
http://asakusa-mizuguch.main.jp/index.html

大仁生活facebook

Comments (0)

Leave a reply