蒙著臉上的一課

蒙著臉上的一課
5 October, 2019 Ms Yu
Avatar
In Articles, Blog, Empower Kids, Ms Yu

尋日午飯後有一堂課,當時已經知道政府會立蒙面法,憂心忡忡。

入到課室見到班小一孩子,就即刻捽一捽眉心,開開心心上堂。講午安之前有位女孩子出嚟問我:「Ms Yu,我可唔可以攞個口罩?」我見到班上唔少人都帶住口罩,就諗到應該有同學病咗,大家要預防一下,我自然批准。

其他同學睇住佢去老師檯度攞口罩,可以乘機離開座位行個圈,就梗係有樣學樣啦,於是陸陸續續有人行出嚟排隊攞口罩。雖然明知大部份不過係人有我有心態,但既然無傷大雅,我就唔出聲,等佢地搞掂先開始。

擾攘幾分鐘,大家返埋位,我望住帶住口罩嘅全班同學,忍唔住苦笑一下。其實我地不過希望佢地有需要時就帶口罩時就帶、無需要就唔帶啫,點解呢種咁卑微嘅自由都要褫奪?

吸一口氣,繼續笑臉,又開始同大家拍手唱歌。

雖然見唔到佢地個樣,但都見到每對彎彎嘅眼睛閃閃咁望住我,我知道每位孩子都在笑。區區一個口罩,從來都唔會阻礙孩子對唔同事物嘅期待,有好多嘢就算蒙得住眼耳口鼻,都蒙唔住赤子之心。佢地隔住口罩都依然可以大聲唱放聲笑,嗰股有時多得過份嘅熱情,係可以完全蓋過每一盤外面潑過嚟嘅冷水。所以佢地任何時候都可以笑住勇往直前、無畏無懼。

孩子啊,身處亂世絕對唔係可以自甘墮落或放縱自己嘅藉口,所以老師對你地期望依然好高好高,唔希望你地成為自私自利嘅人,要勇敢去一點一滴幫手改變世界,要學會使人微笑,亦能懂得與人同悲同哭,但係呢一切期望,都係以你地嘅平安同快樂為依歸,所以凡事量力而為、問心無愧先係重點,唔需要為自己能力範圍內做唔到嘅事自責或者內疚,每日有認真過就足夠喇。

人生要面對嘅冷水有數之不盡咁多盤,今次潑過嚟呢盤接近冰點咁凍。但只要大家一齊保存住與生俱來嗰股熱心,無論幾難都可以一齊捱過。

係。要。齊。齊。整。整。一。起。捱。過。

No one ditches out at this point.

文:Ms Yu,八十後教師,相信一切源自教育。

Comments (0)

Leave a reply