【仔大仔世界】環遊世界 6 大有趣地方

無須搭飛機，唔洗問准媽咪，ohmykids 帶你環遊世界 6 大有趣地方，保證顛覆你想像～

1)【恐龍與牠們的產地】克羅地亞 Brijuni 群島

中歐克羅地亞有個 Brijuni 群島，由十四個小島組成。至今考古學家喺 Veli Brijun 發現超過二百個白堊紀時期(Cretaceous)恐龍腳印，而 Otok Gaz 島形狀十足一條魚仔，令群島聲名大噪，成為旅遊熱點。下次不如嚟一趟尋找恐龍大冒險！！！

即去 Brijuni 群島睇睇：www.croatia.hr/en-GB/experiences/nature/national-park-brijuni

2)【一個人的小鎮】美國內布拉斯加州 Monowi 鎮

從前，有一個小鎮，最風光時有一百五十人住，但走吓一啲、走吓又一啲，最後得返一個人。
自 2004 年丈夫離世後，八十四歲 Elsie Eiler 就成為小鎮唯一居民。鎮長係佢，圖書館管理員係佢，bartender 都係佢。為確保小鎮有水電能正常運作，佢每年要交五百蚊美金稅俾鎮長（即係自己）；並以酒館老闆身份（又係自己）向州政府申請販賣煙酒許可證，由兼任鎮務卿（都係自己）簽發，再交俾酒館老闆。呢個小鎮每年吸引世界各地嘅遊客慕名而來，而 Elsie 會為大家煎漢堡、整熱狗，佢到今日仍然咁愛呢個家，歡迎大家光臨探吓佢～

即去 Monowi 小鎮睇睇：www.bbc.com/travel/gallery/20180129-welcome-to-monowi-nebraska-population-1

3)【真人版 truman show?】荷蘭 Weesp De Hogeweyk 村

住老人院係咪只能被困住，食藥、做吓運動、食飯、睇電視就夠鐘瞓覺？Hogeweyk 村正正打破固有觀念，起咗間腦退化症患者院舍，呢度有餐廳、戲院、超市、髮型屋同花園等設施，直頭係模擬城市！
平日大家可自由選擇自己嘅活動，而職員會化身唔同身份，成為村內園丁、售貨員、美髮師，從中留意佢哋嘅身體狀況。希望有別於一般老人院，等大家可以安全、自在、有空間咁生活，同其他人交流，而呢種生活方式對病情亦有好大幫助。澳洲第一間同類型院舍 Korongee 村預計 2019 年年底完成。

即去 Hogewey 村睇睇：https://hogeweyk.dementiavillage.com/

4)【會發光的魔法森林】澳洲昆士蘭 Springbrook National Park 春溪國家公園

呢度屬於世界遺產「東海岸雨林保護區」，你會喺全天然洞穴入面搵到發光蘑菇(glowing mushrooms)同藍光蟲(glow worms)，仲有人形容係「世界第九大奇蹟」添。由於藍光蟲鍾意溫暖潮濕天氣，12 至 3 月係觀賞藍光蟲最佳時期，公園免費入場，大家可自駕遊或報團參觀。洞內嚴禁開閃光燈同使用電筒。要努力保護所有生物，等大家好耐好耐之後都可以睇到～

即去 Springbrook 國家公園睇睇：http://explorespringbrook.com/

5)【兔仔愛好者天堂】日本大久野島

日本忠海嘅大久野島名副其實係一個由兔仔佔領嘅小島，環島一圈只有 4 公里嘅島上有多達 700 隻野兔。只要你拎住佢哋心愛嘅零食，全部兔仔都會跟住你～另外，島上仲有露營區，下個假期可以帶住帳篷去 camping！

6)【世上最宅小鎮】美國阿拉斯加 Whittier 鎮

前美軍基地 Whittier 係一個風光明媚嘅港口小鎮，只有二百多人口，特別之處係所有人都住喺同一棟大廈 The Begich Tower！呢棟十四層高大廈有齊所有社區設備，包括學校、診所、雜貨店、郵局、警察局等，大家足不出戶就可解決一切生活所需。即係班房可能就喺你隔離房…… 咦？咁咪可以瞓到最後一秒至起身返學囉！

小鎮同外面只靠一條單行隧道連結（呢條亦係北美最長隊道），汽車火車共用，去最近城市 Anchorage 需一小時車程。因單行關係，進出有特定時間表，每半小時會開放車輛進入，另半小時就俾車輛出鎮。注意，每日隧道會關閉，切記要預留充裕時間過隧道，否則就要喺鎮外／車上過夜㗎啦～

即 check 隧道時間表：www.dot.state.ak.us/creg/whittiertunnel/schedule.shtml

【Whittier 老師訪問】

立即睇睇【相信孩子學會】023 行新路挑戰詳情 >>

Photo credits: Istra Culture, BBC Travel, Paris Match, Balloon Aloft Gold Coast, Caters News Agency