【細路可以做電工？】細路能處理的機械操作一覽

6 歲前係小朋友鍛鍊小肌肉力量、靈活性同手眼協調嘅黃金時期，日常除剪紙、貼貼紙、組裝積木外，其實唔少家務亦包含以上訓練元素。透過學習以下 4 種電工操作技巧同機械原理，未來遇到家居問題，細路亦有能力解決！

1) 【3至4歲】入電芯

呢個年紀嘅小朋友已大致做到剪紙、穿珠等動作，小手逐漸有力，建議可加強手指鍛鍊。入電芯係一個唔錯嘅訓練，過程需利用一定手指力量將電芯放到特定位置，有助提高孩子小肌肉力量、手眼協調同專注力。

2) 【4至5歲】換燈膽

孩子手部肌肉基本發展成熟，手指靈活度同力量有顯著進步，能做到唔少講求細節嘅動作，例如擰開樽蓋、上鍊玩具同捏泥膠。家長可嘗試畀小朋友負責更換自己書枱燈或小夜燈燈膽，鍛練小肌肉之餘又可給予適當程度嘅責任感～

*更換燈膽前請先關閉電源

3) 【5至6歲】上螺絲

小朋友手指已相對靈活，普遍可處理更複雜同專注性高嘅工作。上螺絲技巧不高，卻需要持續專注同足夠耐性。如孩子已能完全掌握使用螺絲批，父母可嘗試給較年長的使用電動螺絲批，讓小幫手參與簡單家居維修項目！

4) 【6歲或以上】用電鑽

連好多大人都未必用過嘅電鑽，其實畀小朋友使用並不如大人想像危險。只要專心聽從指示，理解當中危險性，小朋友會更小心使用。建議可先讓讓孩子參加木工班，由專業人士教導技巧及注意事項。

*電鑽涉及利器和高速過程，務必有大人陪同使用

立即睇睇【相信孩子學會】031 挑戰換燈膽詳情 >>