「時光倒流打工仔」最強攻略 你要知嘅7件事

舊年暑假有『未來事業所』，今年 錢家有道 X ohmykids 推出全新玩學理財體驗『時光倒流打工仔』，想知點先玩得最開心，相影得最靚，細路笑住學理財玩到唔捨得走，以下方法一定幫到你~ 立即出發！！

「時光倒流打工仔」7大攻略

1) 傳統智慧 玩學理財

相信爸媽見到呢個活動除咗覺得好玩想帶細路嚟之外，其中一個叮叮聲嘅字係『學理財』，仲要係智慧個隻。今次除咗要完成「事頭」指派嘅任務外，更加喺遊戲中滲透香港歷史同傳統文化，例如大排檔由來、制水事件及花碼字等，玩住了解香港昔日點滴。

場內特設四間懷舊老店，包括大排檔、辦館、藥材舖及理髮店

真。懷舊佈置由專保存香港舊物的收藏家「賣仔勿摸頭」提供，好多都係罕有珍品。

2) 真。免費任玩

為咗令更多小朋友可以玩住學理財，今次活動係真。費用全免，連商場消費都唔駛，真係行埋嚟排個隊就玩得，正！！

提提你：活動晚上6點關門，如排隊人數太多，職員會喺5點開始截龍，確保排咗隊嘅朋友一定有得玩，留意留意～

3) 留意排隊時間

每日11:00am開始玩，開放排隊時間為活動前5至10分鐘，另希望更多小朋友有機會玩，我哋鼓勵由小朋友自己排隊～

每個game約10分鐘完成

4) 襯定衫影靚相

體驗其中一個重要嘅元素，就係小朋友化身「打工仔」配上懷舊服飾，再影啲靚相留念。由於唔係每款都遮晒全身，所以你原本著嚟套衫就會多多少少成為咗一部份。做戲做全套，只要做好準備，零難度打造完美造型。

最佳打底服飾：白色Tee或背心／深色長褲／白襪+白波鞋、白飯魚或人字拖

總之著定白色底衫就最穩陣～

5) 小心保管工作證

因為每玩完一個遊戲就可以吸一個印仔，玩齊4個遊戲就可以出糧換精美紀念品！！

6) 唔好勁叫d細路

呢個係超級極度無敵重要，就係當細路打緊工時，媽咪daddy婆婆爺爺姨媽姑姐不如唔好勁同佢say hi，要小朋友認真，首先我哋都要認真，唔好比佢覺得淨係嚟玩嚟影相咁簡單，你打緊工，阿媽係咁同你講嘢你覺得點？影相係可以嘅，但以唔好影響佢哋打工為大前提。

每個體驗都有安排影相時間俾大家，唔使擔心影唔到靚相～

見到小朋友咁專注打工，我都唔好意思打擾佢～

7）家中延續理財實戰

其實呢次體驗只係細路學理財嘅第一步，最緊要都係爸媽返到屋企同佢一齊實行，想知日常究竟點先做到，去場內錢家屋企，同小朋友一齊搵吓理財法寶，再攞埋一系列實用好玩嘅理財工作紙，最啱返屋企慢慢跟進玩完學咗嘅嘢～

遊戲形式學理財，唔再悶蛋了～

==================================

錢家有道 X ohmykids

時光倒流打工仔   

日期丨 8月15-21日

時間丨11am-6pm

地點丨紅磡置富都會中庭（港鐵紅磡站對面）

年齡丨4-12歲

詳情丨https://goo.gl/FCpn84

#thechinfamily #ohmykids #時光倒流打工仔 #錢家有道 #玩學理財