「未來事業所」最強攻略 你要知嘅10件事

呢個暑假有細路嘅人都為咗呢單嘢搶飛，想知點先玩得最開心，相影得最靚，細路笑住返工學理財玩到唔捨得走，以下方法一定幫到你~ 立即出發！！

齋睇個set已相當吸引～

裡面嘅細位亦做得非常精美～

「未來事業所」10大攻略

1) 玩學理財善用薪金

相信爸媽見到呢個活動除咗覺得好玩想帶細路嚟之外，其中一個叮叮聲嘅字係『學理財』，仲要係智慧個隻。辛苦完有糧出，識得善用先係叻。講真，正常細路梗係會揀買嘢，但爸媽可以提議佢哋試吓儲錢收息， (舖頭仔會不定期推出新貨，有啲正嘢係要儲啲彈藥先買得起！ ) 又可以捐錢幫人，起碼比佢知道駛錢原來可以計劃，唔係有幾多駛幾多！

有食有玩嘅士多令細路嘅人生充滿目標！！

現場有小朋友專屬銀行可以儲錢收息～

每儲$30有$10利息，一星期後就有息收～

捐款裝置雖然唔係真，但讓小朋友抉擇將薪金自用定幫人確實係人性大考驗。

 

2) 留意參加方法

    1）「錢家有道」及「奧海城」Facebook專頁不定時有送飛遊戲，把握機會隨時可以贏職業體驗。

    2）憑奧海城消費：憑奧海城最多2間唔同商戶即日電子貨幣消費滿港幣$300之發票可換取1次職業體驗。

    3）奧海城Olympian Kids會員：憑500 Kids Points即可換取1次職業體驗。

    4）呢個活動預留部分名額俾學校同非牟利機構(兒童服務優先) 預約免費體驗。有興趣可與投資者教育中心。 （最新消息：反應非常熱烈，名額已經full晒lu～）

去呢度憑單或分預約當日嘅職業體驗，由24/7開始，大家可自選工作時段同職業！

記住星期一至五有啲職業係會休息㗎~

以下係每日開放嘅職業：

星期一：警察、醫護人員、郵差、機艙服務員
星期二：警察、醫護人員、建築工人、餐廳服務員
星期三：警察、郵差、機艙服務員、餐廳服務員
星期四：警察、醫護人員、建築工人、餐廳服務員
星期五：警察、醫護人員、郵差、機艙服務員
星期六及日：全部職業

由於活動大受歡迎，原本平日休息職業將全面開放，即係日日開晒6個職業～YAY！！！

 

3) 換飛趁早（每日11:30am開始換飛）

憑奧海城即日電子貨幣消費滿HK$300發票  (最多兩間不同商戶) 或Olympian Kids 500積分可換取1次職業體驗 ，即日發票只可換即日體驗，如果諗住消費換體驗，最好先去換領站問問而家嘅換飛情況，當然越早去換到機會越大。

工作證上清楚列明你預約嘅職業同時間～

 

4) 襯定衫影靚相

職業體驗其中一個好重要嘅元素，就係著起一套套醒神制服，再影啲靚相留念。由於唔係套套衫都遮晒全身，所以你原本著嚟套衫就會多多少少成為咗制服嘅一部份。做戲做全套，只要做好準備，零難度打造完美造型。

簡約基本型（適合所有職業造型，但未至於perfect～）

所需服飾：白色Tee／膝上深色短褲／白襪+白波鞋或黑鞋

力求完美型（每個職業用唔同衫去配搭，簡直係真嘅一樣～）

郵差：灰色長褲／黑色鞋或boots

機艙服務員：(女) 白色短袖恤衫或白tee／黑色半截裙或膝上深色短褲／黑色搭帶鞋 (男) 黑色斯文長褲／白襪+黑鞋

建築工人：白或黑色Tee／牛仔褲／工人boots

警察：黑或深藍色長或短褲／白襪+黑鞋

醫護人員：白或黑色Tee或任何顏色恤衫／黑、深藍或卡其色長褲或膝上短褲／白襪+黑鞋

餐廳服務員：白或黑色Tee／牛仔或任何休閒長褲／波鞋

著定白色底衫就最穩陣～

 

5) 5分鐘前到達工作地點

今次呢個活動有樣嘢真係好抵讚，就係玩之前唔使排隊排餐死（雖然預約場次都可能要排少少），大家只要喺體驗開始前5分鐘到達開工地點，換完衫就已經立即有得玩，簡直係完美！

準時係返工基本要求～

 

6) 俾小朋友足夠心理準備

可能大家會認為職業體驗咪即係俾啲細路去扮吓返工，玩吓，影吓相咁囉～ 但聽聞今次真係非一般嘅體驗，因為小朋友眼見嘅哥哥姐姐唔係普通嘅哥哥姐姐，而係極度認真同專業嘅上司，對員工嘅表現有高要求，有問題亦希望佢哋自己嘗試去解決，返工咪就係咁囉，唔係啲細路真係以為我哋返工係去玩。XP

地盤工作嘅小朋友係堅會流汗㗎～

放工除咗出糧仲有張機遇卡，裡面係反映真實人生嘅事件，有機會加或減錢～

 

7) 玩完再玩無問題

話定俾大家知，其實唔駛一次過玩晒6個職業體驗 (玩晒要3個鐘＠.＠)，主辦單位為咗多啲人能夠玩到，每人每次最多可換領體驗券2張，如果想再玩就要再排隊換飛喇～ 最重要係理財係有進程，儲錢係需要一星期後返嚟先有利息，(好像真㗎～) 所以無需要急，攤開7個星期慢慢玩都未遲。

職業體驗不定時加入新元素，玩完再玩完全冇問題～

 

8) 小心保管工作證

一句講晒，工作證即係銀包，唔見咗係可以開過本新，但裡面所有資料同錢會無晒，重新計過，所以一!!定!!要!!keep好本工作證！

血汗錢就係喺晒呢本工作證度，唔見咗真係會喊豬～～

小朋友用自己賺返嚟嘅錢買嘢，就算只係一包朱古力，見到佢哋係由心度開心出嚟～

 

9) 唔好勁叫d細路

呢個係超級極度無敵重要，就係當細路返工時，媽咪daddy婆婆爺爺姨媽姑姐不如唔好勁同佢say hi，因為人哋真係返緊工㗎，要小朋友認真，首先我哋都要認真，唔好比佢覺得淨係嚟玩嚟影相咁簡單，你返緊工，阿媽係咁同你講嘢你覺得點？影相係可以嘅，但以唔好影響佢哋返工為大前提。

某些比較難影嘅職業體驗都有安排影相時間俾大家，唔使擔心影唔到靚相～

見到小朋友咁專注返工，我都唔好意思打擾佢～

 

10）學習家中理財實戰

其實呢個職業體驗只係細路學理財嘅第一步，最緊要都係爸媽返到屋企同佢一齊實行，想知日常究竟點先做到，去場內錢家屋企，同小朋友一齊搵吓理財法寶，唔睇真係唔知原來俾細路用八達通都有技巧，其餘幾樣都真係幾實用，大人都要學吓～

遊戲形式學理財，唔再悶蛋了～

==================================

錢家有道 X 奧海城

未來事業所   

日期丨7月17日- 8月31日

時間丨12pm – 8pm (平日)  12pm – 9pm (週末)

地點丨奧海城2期地下主題中庭

建議年齡丨4-10歲

活動詳情丨http://futureme.hk/

#ohmykids #未來事業所 #奧海城 #錢家有道 #職業體驗 #智慧理財